Վրաստանում երկու թուրք գործարար`թուրքական «Աքսամշեն» շինարարական ընկերության գլխավոր տնօրենը եւ նրա տեղակալը ձերբակալվել են կաշառք տալու համար, իսկ արդարադատության նախարարության որոշ ներկայացուցիչներ`կաշառքը վերցնելու համար:
Նշենք, որ «Աքսամշեն» ընկերությունը Թբիլիսիի Օրթաճալա թաղամասում Արդարադատության նախարարության նոր շենք էր կառուցում, իսկ աշխատանքի վերահսկողությունը եւ պատասխանատվությունը կրում էին նախարարության բարձրաստիճան պաշտոնյաներ Զազա Չիչուասան եւ նրա տեղակալ Զազա Գադելիան: Նրանք նաեւ պետք է համակարգեին օբյեկտի վրա ընթացող աշխատանքները, ինչպես նաեւ ընդունեին եւ հանձնեին աշխատանքը:
Սակայն նրանք կեղծել են հաշվետվությունները եւ վճարման փաստաթղթերը, որի համար էլ «Աքսամշեն» ընկերության գլխավոր տնօրեն Իորհան Աքսուսը կաշառք տալու համար դատապարտվել է 12 տարվա ազատազրկության, իսկ նրա տեղակալը`5 տարվա: Նրանց գործում նշված է, որ ձերբակալման պատճառը եղել է հեռախոսային զրույցը, չնայած տեղի է ունեցել նաեւ գաղտնի տեսագրություն եւ ձայնագրում:
Ինչպես հայտնում է Journalist.ge վրացական գործակալությունը, Թուրքիայի դեսպանատունն արդեն հետաքրքրվել է այդ գործով, եւ պաշտոնական նոտա է պատրաստում: Հրեա գործարարների ձերբակալումից հետո, կասկածներ կան, որ այս գործն էլ հերթական սկանդալը կբարձրացնի, ինչը բացասական անդրադարձ կունենա Վրաստանի ժողովրդավարական եւ իրավական իմիջի վրա:
Հիշեցնենք, որ Վրաստանում ձերբակալվել են 2 հրեա գործարարներ, որոնք կաշառք են առաջարկել վրացի պաշտոնյաներին, միջազգային արբիտրաժային դատարանում հայց չներկայացնելու համար:
