Ոստիկաններն առավոտյան արգելել են ԱԺ «Հայաստան» խմբակցության պատգամավոր Գառնիկ Դանիելյանին մուտք գործել Կիրանց: Նրանք նշել են, որ միայն գյուղացիների մուտքն է թույլատրվում: Կիրանց մտնելու համար ոստիկանները պահանջում են անձը հաստատող փաստաթուղթ։
«Սաղի դեմքերը ֆիքսեք: Ի՞նչ ա նշանակում ԱԺ պատգամավորի հետ չենք խոսում»,- բարկացած հարցրեց «Հայաստան» խմբակցության պատգամավորը՝ գյուղի մուտքի մոտ կանգնած իրավապահներին: «Հարգելիս, Դուք չեք ներկայացել, թե ով եք: Ես Ձեզ առաջին անգամ եմ տեսնում»,- պատասխանեց ոստիկաններից մեկը: «Դուք լավ էլ գիտեք, թե ես ով եմ ու ես նաև ներկայացել եմ: Դուք ինձ լավ էլ գիտեք, բոլորդ էլ ճանաչում եք: Հերիք ա երեսպաշտությամբ զբաղվեք: Ոչ ոք իրավունք չունի մեր ազատ տեղաշարժի իրավունքը խոչընդոտ»,- հայտարարեց օրեր շարունակ Տավուշի սահմանամերձ գյուղերում ակցիաների մասնակցող պատգամավորը:
Հիշեցնենք, որ վաղ առավոտյան ժամը 6-ի սահմաններում ոստիկանության մեծ ուժեր են ժամանել Կիրաց գյուղ, որտեղից բիրտ ուժ կիրառելով բերման են ենթարկել ճանապարհը փակած բնակիչներին, այդ թվում անչափահասների: Ականատեսները պատմում են, որ մարդկանց ծեծելով են բերման ենթարկել: Ոստիկանության բաժանմունքի մոտ է նաեւ Բագրատ Սրբազանը:
ՆԳՆ-ն հաղորդագրություն է տարածել՝ նշելով, որ ՊՆ-ն ականազերծման աշխատանքներ է իրականացնում Կիրանց-Խեյրիմլի հատվածում, դրա համար ճանապարհները փակվել են: Թույլ չեն տալիս գյուղ մտնել նաեւ լրագրողներին:
Գյուղապետ Կամո Շահինյանի խոսքով, նրանք հերթապահություն էին իրականացնում, որպեսզի թույլ չտան ականազերծման աշխատանքներ իրականացնել:
