Նիդերլանդների նոր կառավարական կոալիցիան՝ Գերտ Վիլդերսի ծայրահեղ աջ Ազատության կուսակցության (PVV) գլխավորությամբ, հայտարարել է, որ կշարունակի քաղաքական և ռազմական աջակցությունն Ուկրաինային, հայտնում է NOS-ը։
Հինգշաբթի օրը հրապարակված կոալիցիոն համաձայնագրում ասվում է, որ Նիդերլանդները կշարունակի աջակցել Ուկրաինային «քաղաքական, ռազմական, ֆինանսական և բարոյապես ռուսական ագրեսիայի դեմ»:
Միևնույն ժամանակ, կոալիցիան նաև իրավականորեն պարտադիր կդարձնի Նիդերլանդների ՀՆԱ-ի առնվազն 2%-ի ծախսերը պաշտպանության վրա՝ ՆԱՏՕ-ի հետ համաձայնագրերին համապատասխան։
Նշենք, որ Ուկրաինա Ռուսաստանի լայնամասշտաբ ներխուժումից հետո Վիլդերսը փոքր-ինչ հեռացավ Կրեմլից՝ ներխուժումն անվանելով սխալ: Բայց նա չաջակցեց Ուկրաինա լրացուցիչ զենք ուղարկելուն։ Սակայն կառավարական կոալիցիայի մյուս կուսակցությունները կողմ են Կիևին ռազմական օգնության տրամադրմանը։
Հատկանշական է, որ Վիլդերսը, որի քաղաքական ուժը հաղթեց խորհրդարանական ընտրություններում, վերջերս գրել էր, որ «մինչ PVV-ն պայքարում է Նիդերլանդների համար, միլիարդներ են թռչում արտերկիր»՝ նկատի ունենալով Ուկրաինային մեկ միլիարդ եվրո օգնություն հատկացնելու Հաագայի ապրիլի որոշումը։
Ինչպես նշում է Reuters-ը, չորս կուսակցությունների կոալիցիան ասում է, որ կփնտրի «պատմության մեջ ապաստանի ամենախիստ ռեժիմը»՝ ավելի ուժեղ սահմանային հսկողությամբ և Նիդերլանդներ ժամանող ապաստան հայցողների համար ավելի խիստ կանոններով:
