Անհայտ անձինք փորձել են հրկիզել Վարշավայի կենտրոնում գտնվող սինագոգը, միջադեպի հետևանքով տուժածներ չկան: Այս մասին հայտարարել է հանրապետության արտաքին գործերի նախարար Ռադոսլավ Սիկորսկին՝ հղում անելով Լեհաստանի գլխավոր ռաբբի Միխայել Շուդրիխին։
«Ռաբբի Շուդրիխը գրում է, որ ինչ-որ մեկը փորձել է մոլոտովի կոկտեյլով հրկիզել Նոժիկովի սինագոգը։ Փառք Աստծո, ոչ ոք չի տուժել»,- X-ում գրել է նախարարը։
Լեհական լրատվամիջոցները նշում են, որ դեպքի մասին տեղեկացվել է մայրաքաղաքի ոստիկանությունը և արդեն հետաքննում է այն։
Զալման և Ռիվկա Նոժիկի ամուսինների անունով սինագոգը (Նոժիկի սինագոգ), որը Լեհաստանի հրեական համայնքների միության գլխավոր սինագոգն է, միակն է, որը վերապրել է Երկրորդ համաշխարհային պատերազմը Վարշավայում։ 1997 թվականին այն արդեն հրկիզվել է, ինչի հետեւանքով վնասվել է շենքի նախասրահը։
