Ուկրաինան կորցրել է ջերմակայանների հզորությունների 90 տոկոսը Ռուսաստանի հրթիռային հարվածների հետեւանքով, հայտնել է Գերագույն ռադայի «Батькивщина»-ի պատգամավոր, կոմունալ ծառայությունների նախկին նախարար Ալեքսեյ Կուչերենկոն։
«Մենք կորցրել ենք 8 հազար մեգավատ էլեկտրաէներգիա, դա շատ շատ է։ Ես երեկ շփվել եմ էներգետիկների հետ, 8 հազարից աշխատում է 800-ը»,- ասել է Կուչերենկոն յութուբյան «Вышка»-ի եթերում։
Նրա խոսքով՝ էլեկտրականության սահմանափակ սպառումը կշարունակվի երկար, թե՛ ամռանը, թե՛ ձմռանը։ Իրավիճակն արմատապես առաջիկայում չի փոխվի, քանի որ մասնագետները չեն կարողանա արագ նորոգել կայանները, նշել է Կուչերենկոն։ Նա կարծում է, որ էլեկտրաէներգիայի ներմուծման ծավալների ավելացումը ԵՄ երկրներից չի օգնի Ուկրաինային խուսափել դեֆիցիտից։
Ռուսաստանը վերսկսել է հրթիռային հարվածները Ուկրաինայի էներգետիկ կառուցվածքին գարնան սկզբին։ Վնասվել են ԴնեպրոՀԷԿ-ը, Տրիպոլյան ՋԷԿ-ը Կիեւի մարզում, Բուրշտինյան ՋԷԿ-ը Իվանո-Ֆրանկովսկում, Լադիժյան ՋԷԿ-ը Վիննիցայում, Զմիեւյան ՋԷԿ-ը Խարկովում եւ այլն։
Ուկրաինայի էներգետիկայի նախարար Գերման Գալուշչենկոն երկրի էներգետիկային Ռուսաստանի պատճառած վնասն անվանել է «հսկայական»։ Նրա խոսքով՝ Ուկրաինան կորցրել է մինչեւ 8 ԳՎտ էներգիա, որը նա արտադրում էր ձմռան շրջանի համար։
Ուկրաինայի վարչապետ Դենիս Շմիգալը մայիսի սկզբին տեղեկացրել էր, որ երկրում ոչնչացվել կամ վնասվել է ավելի քան 800 ջերմամատակարարման օբյեկտ, որոնց վերականգնման համար «վիթխարի գումար կպահանջվի՝ մոտ 1 մլրդ դոլար»։
Մայիսի 20-ից Ուկրաինայում մտցվել են էլեկտրաէներգիայի անջատումներ։ Էլեկտրականությունը խնայելու են ըստ ժամանակացույցի՝ ժամը 18.00-ից մինչեւ 24.00-ն։
