Երեւանում այսօր` մայիսի 17-ին ժամը 21:10-ի սահմաններում խոշոր ավտովթար է տեղի ունեցել Արցախի փողոցում, կան զոհեր (ֆոտոռեպորտաժ):
Ինչպես դեպքի վայրից NEWS.am-ին հայտնում է ֆոտոլրագրող Գագիկ Շամշյանը, Արցախի փողոցում` 28 շենքի դիմաց, միմյանց են բախվել «Մերսեդես» մակնիշի 23 ՍԼ 673 համարանիշի եւ «ԳԱԶԵԼ» մակնիշի 3456 Տ համարանիշի թիվ 76 երթուղին սպասարկող ավտոմեքենաները:
Բախման հետեւանքով, «ԳԱԶԵԼ»-ը պայթել է եւ հրդեհ է բռնկվել: Երկու մեքենաներն էլ, կարելի է ասել, մոխրի են վերածվել: Այս պահին փրկարարները փորձում են մեքենաների միջից հանել այրված դիակները:
Երթեւեկությունը նշված հատվածում դադարեցվել է: Ամբողջ տարածքը լցված է քաղաքացիներով: Դեպքի վայրում են հրշեջ մեքենաները:
Ընդհանուր առմամբ, մահացել է 4, վիրավորվել` 9 մարդ: Վիրավորներից մեկը 7 տարեկան երեխա է: Բոլոր վիրավորները տեղափոխվել են «Էրեբունի» բժշկական կենտրոն:
Դեպքի վայր են ժամանել ոստիկանության Էրեբունիի բաժնի օպերատիվ-քննչական խումբը` բաժնի պետ Գրիգոր Գրիգորյանի գլխավորությամբ, նաեւ ԱԻՆ Հայաստանի փրկարար ծառայության Երեւանի փրկարարական վարչության փրկարարական խումբը` վարչության պետ Մուշեղ Ղազարյանի գլխավորությամբ:
Այստեղ են նաեւ Երեւանի ճանապարհային ոստիկանության աշխատակիցները` Երեւանի ՃՈ պետ Արսեն Մարդոյանի գլխավորությամբ, ԱԻՆ Հայաստանի փրկարար ծառայության պետ Սերգեյ Ազարյանը, նույն ծառայության օպերատիվ վարչության աշխատակիցները` վարչության պետ Արման Ցոլակյանի գլխավորությամբ, Երեւան քաղաքի դատախազ Հրաչյա Բադալյանը, Երեւանի փոխոստիկանապետ Աշոտ Միրիջանյանը եւ Էրեբունիի վարչական շրջանի դատախազը:
Դեպքի վայրում քննչական աշխատանքներ կատարելու համար ժամանել են ոստիկանության քննչական գլխավոր վարչության, Երեւանի քննչկան վարչության ճանապարհատրանսպորտային հանցագործությունների քննության բաժնի գրեթե բոլոր քննիչները` բաժնի պետի ժամանակավոր պաշտոնակատար Լեւոն Շմավոնյանի գլխավորությամբ: Հիվանդանոց են մեկնել ՃՏՀ քննության բաժնի ավագ քննիչներ Մանվել Մուրադյանը, Արտաշես Վանյանը, քննիչներ Խաչիկ Սամվելյանը, Դավիթ Մարտիրոսյանը, Աշոտ Ասատուրյանը, ՀԿԳ ավագ քննիչ Կարեն Ստեփանյանը` ճշտելու հիվանդանոց տեղափոխված անձանց ինքնությունը:
Դեպքի վայրում փորձարարական աշխատանքներ են կատարում ոստիկանության փորձաքրեագիտական վարչության փորձագետները:
Լուսանկարները եւ տեսանյութը՝ Գագիկ Շամշյանի
