Սպառողների ազգային ասոցիացիայի սննդի անվտանգության փորձագետ Ֆրունզե Հայեթյանը այսօր՝ դեկտեմբերի 29-ին հրավիրած մամուլի ասուլիսում որոշ մեկնաբանություններ է հնչեցրել ձվի շուկայում ստեղծված դեֆիցիտի վերաբերյալ։ Նրա խոսքով՝ այն, ինչ հիմա տեղի է ունենում՝ պատահական չէ, եւ հետեւանք է ձվի շուկայի ամառային աժիոտաժի, երբ այն խանութներում վաճառվում էր ինքնարժեքից ցածր։ «Շատ արտադրողներ մղվեցին դուրս, չկարողացան գոյատեւել»,- ասաց Ֆ. Հայեթյանը։ Նրա կարծիքով՝ հատկապես տուժել են մանր գյուղացիական տնտեսությունները, որոնք էապես նվազեցրել են շուկաներին մատակարարվող ձվի ծավալները։
Փորձագետը թվեց նաեւ մի շարք այլ պատճառներ, որոնք կարող էին հանգեցնել ձվի թանկացման։ Դրանցից մեկն էլ կերի թանկացումն է։ Թեեւ խոշոր թռչնաբուծարանները ունեն կերի սեփական արտադրություն, այնուամենայնիվ՝ այդ կերի որոշ բաղադրիչներ ներկրում են։ «Արաքս» թռչնաֆաբրիկայից Հայեթյանին ասել են, որ ներկրվող կերի հումքը նույնպես թանկացել է։
Մյուս պատճառը ձվի սպառման ավելացումն է։ Ըստ Հայեթյանի՝ հայաստանցիները ներկայում 1,5 անգամ ավելի շատ ձու են օգտագործում, քան 1 տարի առաջ։ Դրան նպաստել է մյուս սննդատեսակների թանկացումը, որի պարագայում ձուն մնում է ամենաէժան եւ կալորիապես հարուստ սննդատեսակը։