Հայաստանի Ոստիկանության քննչական գլխավոր վարչության Երեւանի քննչական վարչության քննիչի կողմից հարուցվել է քրեական գործ ՀՀ քրեական օրենսգրքի 34-176 հոդվածի 2-րդ մասի 1-ին եւ 4-րդ կետերի հատկանիշներով (կողոպուտ, որը կատարվել է մի խումբ անձանց կողմից նախնական համաձայնությամբ, զուգորդվել է կյանքի կամ առողջության համար ոչ վտանգավոր բռնություն գործադրելով): Ֆոտոլրագրող Գագիկ Շամշյանը NEWS.am-ին հայտնեց, որ նշված հոդվածներով մեղադրվում են Արմավիրի մարզի Լեռնագորգ գյուղում ծնված Երեւանի Մարտիկյան փողոցի 16 տանը վարձակալական հիմունքներով բնակվող 26-ամյա Տարոն Ժիրայրի Խաչատրյանը եւ Երեւանի Արտաշիսյան 37 շենքի 18 բնակարանի բնակիչ 22-ամյա Մհեր Ռուբենի Համբարձումյանը:
Դեկտեմբերի 13-ին, ժամը 13:30-ի սահմաններում Երեւանի Մովսես Խորենացու փողոցում գտնվող «Վաղարշ եւ Որդիներ» ոսկու շուկայի աշխատակից 31-ամյա Լուսինե Դավթյանի Մանուչարյանը դուրս է եկել շուկայի հարեւանությամբ գտնվող, Դեղատան 15 հասցեում գործող թանկարժեք մետաղներից պատրաստված իրերի հարգադրոշմման կետից: Այդ պահին նրա վրա է հարձակվել Տարոն Խաչատրյանը, հարվածել կնոջ գլխին, խլել պայուսակը եւ դիմել փախուստի: Գողացված պայուսակում եղել են արծաթյա եւ ոսկյա կանացի զարդեր՝ 1 միլիոն 800 հազար դրամ արժողությամբ: Լուսինեն վազելով կողոպտչի հետեւից օգնութուն է կանչել: Տիգրան Մեծի 12 շենքի մոտակայքում մարմնական վնասվածքներ ստացած կինը ընկել է գետնին: Այդ պահին մոտակայքում գտնվող ոստիկանության Երեւանի վարչության քրեական հետախուզության բաժնի ավագ օպերլիազոր Մանվել Հակոբյանը նկատել է, թե ինչպես է մի երիտասարդ՝ ձեռքին պայուսակ, տաքսի ավտոմեքենա նստում: Ոստիկանը մոտեցել է Լուսինեին, եւ երբ տեղեկացել է, որ նրան կողոպտել են, հետապնդել է տաքսուն, որի մեջ քիչ առաջ նստել էր գողացված պայուսակով երիտասարդը: Ոստիկանին հաջողվել է հենց մեքենայի մեջ բռնել կողոպտչի ընկերոջը՝ Մհեր Համբարձումյանին, իսկ Տարոնը դիմել է փախուստի:
Այդ ժամանակ օպերլիազորն իրեն ամրակցված հաշվեցուցակային «Մակարով» տեսակի ատրճանակից նախազգուշական մեկ կրակոց է արձակել օդ: Կրակոցի ձայնը լսելով դեպքի վայրին են մոտեցել մոտակայքում իրենց ծառայությունը կատարող ՀՀ ոստիկանության պարեկապահակային ծառայության գնդի ոստիկանները: Քաղաքացիներն ու ոստիկանության պարեկապահակային ծառայության աշխատակիցները հետապնդել են Տարոնին մինչեւ Վարդան Մամիկոնյանի արձանի մոտ եւ այդտեղ էլ վնասազերծել կողոպտչին: NEWS.am-ի տեղեկություններով, կողոպտիչները մեկ շաբաթ նախապես ճշտել են իրենց զոհի՝ Լուսինեի տեղաշարժը, ժամերը: Կողոպուտի օրը վարձել են «Ռելաքս» տաքսի ծառայության ավտոմեքենա, վարորդին ասելով, որ մեկնելու են Վանաձորի զորամաս (Դուց) եւ մինչեւ մեկնելը պետք է ոսկու շուկայի մոտ իրենց ազգականին տեսնեն եւ նրանից վերցնեն սննդով լի պայուսակ:
Նշենք, որ այս պահին կասկածյալ կողոպտիչները գտնվում են Երեւանի ժամանակավոր պահման մեկուսարանում: Իսկ այսօր՝ դեկտեմբերի 16-ին, քննչական մարմինը դիմելու է Կենտրոն եւ Նորք-Մարաշ վարչական շրջանների ընդհանուր իրավասոթյան դատարան՝ միջնորդությամբ, որպեսզի կողոպտիչների նկատմամբ որպես խափանման միջոց կիրառվի երկամսյա կալանք:
Ելենա Գեւորգյան
Հ.Գ. NEWS.am-ն ավելի վաղ՝ դեկտեմբերի 13-ին տեղադրել էր տեսանյութ, թե ինչպես է ոստիկանության աշխատակիցը վնասազրեծում կողոպտիչներից մեկին՝ Մհեր Համբարձումյանին: Տեսանյութը տրամադրել էր ընթերցողը:
Տարոն Խաչատրյան
Մհեր Համբարձումյան
ավագ օպերլիազոր Մանվել Հակոբյան
Լուսանկարները եւ տեսանյութը՝ Գագիկ Շամշյանի