Երեւանի Սասնա Ծռեր փողոցի թիվ 2 հասցեում գտնվող նորակառույց շենքի վերելակի ընկնելու հետեւանքով երկու տուժածներից մեկը` 45-ամյա Խաչիկ Եփրեմյանը, դեռեւս շարունակում է գտնվել վերակենդանացման բաժանմունքում։ Այս մասին NEWS.am-ին հայտնեցին Առողջապահության նախարարությունից; Մասնագետները նրա վիճակը գնահատում են կայուն` միջին ծանրության։ Երկրորդ տուժածի` 60-ամյա Գեւորգ Սաֆարյանի վիճակը համեմատաբար թեթեւ է, նրա բուժումը շարունակվում է վիրաբուժական բաժանմունքում:

Հիշեցնենք, որ Երեւանի Սասնա-ծռեր փողոցի թիվ 2 հասցեում գտնվող նորակառույց շենքի 17-րդ հարկից վերելակի ճոպանը պոկվել է, ինչի հետեւանքով վերելակն ընկել է հորանում աշխատողների վրա: Այս մասին ահազանգը Արտակարգ իրավիճակների նախարարությունը ստացել է հոկտեմբերի 25-ին, ժամը 17.22-ին: Վերելակը, գրանցված չէր ԱԻՆ ռեեստրում եւ չէր անցել փորձաքննություն: Պատահարի հետեւանքով զոհվել եւ վիրավորվել է երկուական անձինք: Շտապօգնության աշխատակիցները տուժածներին տեղափոխել են «Արմենիա» հանրապետական բժշկական կենտրոն: Ոստիկանության լրատվական ծառայությունից NEWS.am-ի թղթակցին հայտնել էին, որ փաստի առթիվ քննչական բաժնում ՀՀ քրեական օրենսգրքի 157 հոդվածի 2-րդ մասի հատկանիշներով հարուցվել է քրեական գործ (աշխատանքի պաշտպանության կանոնները խախտելը):