նախընտրելի դարձնել
Քանաքեռի զորամասում այսօր` սեպտեմբերի 9-ի գիշերը, հայտնաբերվել է շարքային զինծառայող Արման Սարգսյանի դին: Այս մասին հայտնեցին NEWS.am-ի աղբյուրները; Ըստ նախնական եղեկությունների` նա ինքնասպանություն է գործել: Զինվորը թողել է նաեւ գրություն հետեւյալ բովանդակությամբ` «կատարվածի մեջ ոչ մեկին չմեղադրեն»: ՀՀ ՊՆ քննչական ծառայության հասարակայնության հետ կապերի սպա Մերի Սարգսյանը NEWS.am-ի թղթակցի հետ զրույցում հաստատեց մեր ունեցած տեղեկությունները:
«Երեւանի կայազորում տեղակայված զորամասերից մեկից ՀՀ ՊՆ քննչական ծառայության 4-րդ կայազորային քննչական բաժնում ստացվել է հաղորդագրություն, համաձայն որի 2012թ սեպտեմբերի 9-ին ժամը 02:15-ի սահմաններում ժամապահի պարտականությունները կատարելիս` պահակային ծառայությունում հայտնաբերվել է նույն զորամասի ժամկետային զինծառայող շարքային Արման Սեյրանի Սարգսյանի դին: Նախնական տվյալներով ինքնասպան եղած վիճակում: Դեպքի վայր է մեկնել օպերատիվ քննչական խումբը, կատարվել է դեպքի վայրի զննություն, այլ անհետաձգելի քննչական գործողություններ, նշանակվել են մի շարք փորձաքննություններ» ,- հայտնեց նա: Ինչ վերաբերում է թողած գրությանը, ապա նախաքննության շահերից ելնելով` Մերի Սարգսյանը ոչինչ չհայտնեց:
Փաստի առթիվ ՀՀ ՊՆ քննչական ծառայութան 4-րդ կայազորային բաժնում ՀՀ Քրօրի 110 հոդվածի 1-ի հատկանիշներով հարուցվել է քրեական գործ, կատարվում է նախաքննություն (Ինքնասպանության հասցնել):
Նշենք, որ Արման Սարգսյանը զորակոչվել է 2011 թվականի գարնանը Աշոցքի զինկոմիսարիատից:
